Amakuru dukesha BBC new nuko Minisitiri w’ubuzima Matt Hancock yabwiye BBC ko umuntu wa mbere azaruterwa kuwa mbere, avuga ko iyi ari “intambwe ikomeye” mu rugamba n’iyi virusi.
Uru rukingo ruzafasha gahunda yo gukingira yari yaratangiye mu Bwongereza hakoreshejwe urukingo rwa Pfizer nk’uko abivuga.
Iki gihugu cyatumije doze miliyoni 100 z’uru rukingo – zihagije gukingira abaturage miliyoni 50
Kuba rwemejwe n’abagenzuzi b’imiti, bisobanuye ko rukora kandi rufite ubuziranenge nk’uko James Gallagher umunyamakuru wa BBC ishami ry’ubuzima abivuga.
- Afurika izahabwa doze miliyoni 220 z’urukingo rwa Covid-19
- Ubwongereza bubaye igihugu ca mbere cemeje urucanco Pfizer rwa Covid
- Covid-19: Urukingo Pfizer rwemerewe gukoreshwa by’amaburakindi muri US
- Covid-19: Kugeza urukingo ku isi ‘bizasaba indege 8000 nini cyane’
BBC ivuga ko Minisitiri Hancock yayitangarije, ati: “ubu nakwemeza ntashidikanya ko dushobora gukingira buri muturage.
“Doze miliyoni 100 kongeraho doze miliyoni 30 z’urukingo rwa Pfizer, izo zirahagije ngo buri muturage abone doze ebyiri”.
Ibi bibaye mu gihe hari ikindi cyiciro cy’abatuye ahantu runaka mu Bwongereza bitegura gushyirwa muri “guma mu rugo”, kubera imibare mishya y’abanduye ikomeje kuzamuka.
Ejo kuwa kabiri gusa, batangaje abantu bashya 53,135 banduye mu Bwongereza na 414 bapfuye nyuma y’iminsi 28 gusa basanze baranduye.
Urukingo rwa Oxford-AstraZeneca rwatunganyijwe kuva mu mezi ya mbere ya 2020, mu mpera z’ukwa kane nibwo rwageragejwe bwa mbere ku muntu, nyuma rutangira kugeragezwa ku bantu benshi.
Ni urukingo rwa kabiri rwemejwe mu Bwongereza nyuma y’urwa Pfizer-BioNTech narwo rwemejwe rukanatangira guhabwa abantu mu ntangiriro z’uku kwezi kwa 12.
Kuva ubwo kugeza ubu abantu 600,000 mu Bwongereza bamaze gukingirwa, bitari iby’igerageza.
Uru rukingo rushya biteganyijwe ko rwihutisha iyi gahunda kuko rwo rushobora kubwikwa muri frigo isanzwe, mu gihe urwa Pfizer-BioNTech rusaba kubikwa mu bukonje bwa -70C.
Mu gukingira abaherwaho ni abageramiwe n’iki cyorezo barimo abakuze n’abakora kwa muganga.