Igisirikare cya Leta ya Repubulika Iharanira Demokarasi ya Kongo, FARDC kiravuga ko cyishe abarwanyi 11 b’inyeshyamba za M23, nyuma y’imirwano ikomeye yabereye mu ishyamba rya Pariki ya Virunga mu mpera z’icyumweru gishize.
Ikinyamakuru umuryango.com cyavuze ko ibi byavuzwe n’umukomandao w’ingabo za leta muri ako karere, kuri iki cyumweru.
Abasirikare bishe izi nyeshyamba mu mutego babateze kuwa gatanu w’icyumweru gishize,nyuma y’iminsi ine hari amakuru yo muri ako karere yavuze ko hari igitero cyabaye cyahitanye abantu bagera kuri 30.
Colonel Honore Rindugu, komanda w’ikigo cy’igisirikare cya RDC iri ku mupaka iki gihugu gihana n’u Rwanda na Uganda, yavuze ko inyeshyamba zapfiriye muri icyo gitero zishobora kuba zirenga uwo mubare.
Rindugu yavuze kandi ko igisirikare cyumvirije mu ibanga itumanaho ry’umwanzi, aho M23 ngo yavugaga ko hari abarwanyi bayo hafi 30 baburiwe irengero.
Uyu mutego ukurikiye igitero simusiga cyakozwe na M23 mu ijoro ryo ku wa mbere i Nyesisi, mu ntara ya Kivu y’Amajyaruguru hafi y’ishyamba rya Virunga, ku birometero 50 uva ku murwa mukuru w’iyo ntara,Goma.
Abakozi b’Ishyirahamwe ritabara imbabare Croix Rouge muri ako karere bavuze ko abasirikare hafi 32 bapfiriye muri icyo gitero. Leta yo yavuze ko hapfuye abatari bake barimo n’umusirikare w’ipete rya colonel.
M23 ni umwe mu mitwe 120 yitwaje intwaro ikambitse mu majyepfo ya Republika ya demokarasi ya Kongo, aho izo ntambara zimaze imyaka irenga 20.