Minisiteri y’Ubuzima yatangaje ko abantu batanu bishwe na Coronavirus bituma umubare w’abamaze guhitanwa n’iki cyorezo mu Rwanda uba 110 mu gihe abanduye bo biyongereyeho 107 bagera ku 8955.
Abitabye Imana barimo abagabo bane b’imyaka 65, 64, 57 na 45 bo mu Mujyi wa Kigali n’umwe w’imyaka 69 wo mu Karere ka Nyamasheke.
Itangazo rya Minisante ryerekana ko kuri uyu wa Kabiri hagaragaye abarwayi 107 bakuwe muri “Kigali: 44, Bugesera: 20, Musanze: 17, Huye: 7, Rusizi: 5, Nyamasheke: 3, Rubavu: 2, Nyamagabe: 2, Muhanga: 2, Ruhango: 2, Kamonyi: 2, Nyanza: 1.’’
Mu Rwanda hamaze gufatwa ibipimo bya Coronavirus 745 252, hasanzwemo abantu 8955 banduye. Muri bo 6878 basezerewe mu bitaro nyuma yo gupimwa bagasangwa nta bwandu bagifite mu gihe 1967 bakiri kwitabwaho.
Abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.
